Выбранная

О священная главо, земный Ангеле, небесный человече, великий чудотворче, преподобне отче Корнилие! К тебе с верою и любовию усердно прибегающе, умиленно просим тя, небеснаго предстателя нашего: яви нам, смиренным и грешным, любовь твою отеческую и многомощное твое заступление: се бо грех ради наших, не дерзаем, с свободою чад Божиих, просити Господа и Владыку нашего о нужных нам на потребу, но тебе, молитвенника к Нему благоприятнаго, предлагаем, верующе несомненно, яко вся благая можеши нам испросити у благости Его, аще токмо восхощеши. Испроси убо нам, угодниче Божий, у всещедраго и человеколюбца Бога, веру праву, благочестие непоколебимое, покаяние совершенное, жития исправление решительное: да прочее не прогневляем Господа нарушением святых Его заповедей и сподобимся прощение грехов наших от Него получити. Сохрани, святче Божий, молитвами твоими Церковь Христову от ересей и расколов, суеверия и неверия человеческаго, да цветет в ней святое православие во всей силе и приносит плоды спасительныя душам. Соблюди от всякаго зла и обитель, тобою созданную, и вся живущия и подвизающияся в ней по твоим уставам, да целы и невредимы пребудут от искушений врага спасения человеческаго. Призри милостивно и на предстоящия раце мощей твоих и молящияся люди, иже в обитель твою приходят на поклонение, и вся прошения их во благо исполни: болящим исцеление, скорбящим утешение, бедствующим вспоможение скоро подаждь. Всем же нам здравие душевное и телесное, земли плодоносие, тихое и богоугодное житие, благую христианскую кончину и добрый ответ на страшном суде Христовом у всемилостиваго Бога исходатайствуй, яко воистинну имеяй велие к Нему дерзновение. Ей, отче! вемы, яко много может молитва твоя пред лицом Вседержителя Господа: сего ради крепко на тя уповаем, и на твоя святыя молитвы зело надеемся, яко ты приведеши нас предстательством твоим в небурное пристанище спасения и наследники покажеши нас всесветлаго царствия Христова. Не посрами же, святче отче наш, упования нашего и сподоби нас вкупе с тобою блаженства райскаго наслаждатися, да славим, хвалим и величаем милость к нам человеколюбца Бога, Отца и Сына и Святаго Духа, и твое благое отеческое заступление, во веки веков. Аминь.