Выбранная

Святый и славный великомучениче Иоанн, христиан забрало крепкое, купец всеизрядный, скорый помощниче всем к тебе прибегающим. Морскую плавая пучину куплею, от востока тщался еси к северу, но Бога призвавшу тя, яко же Матфей мытницу, иже куплю оставль, и Тому последовал еси кровию мучения, временными искупив непроходимая, и венец принял еси непобедимый. Прехвалне Иоанне, тебе ни сверепство мучителя, ни словес ласкания, ни мук прещения, ни горькая биения от Христа отторгша, Его же от младенства возлюбил еси, Ему же и молися даровати душам нашим мир и велию милость. Премудрости рачитель быв, сокровище добродетелей, оттуду же и почерпал еси Божественная разумения. Тем же и времени призвавшу, к подвигом усердно совлекся еси, приемля мучениские раны, плоти содробление и кровей истощание, и ныне живеши в неизреченно свете с мученики. Сего ради вопием тя: моли Христа Бога грехов оставление даровати покланяющимся верою святым мощем твоим. Лук сокруши нечестивых, воине непобедиме, неправедно движимыи на твое достояние, еже себе избрал еси, возлюбив, и отечество наше утверди, да и мы тихо и мирно препроводим жительство. Свету невечернему предстоя, блаженне, с мученискими лики, воспевающие тя в памяти твоей, от искушения спасай молитвами твоими. Аминь.